Ақтауда басқаларға қорлық көрсеткен бұзақы қыздарға қатысты қылмыстық іс қозғалды

Әлеуметтік желіде бір топ бұзақы қыз басқа қыздарды ұрып, қорлаған бейнежазбасы тарап кетті. Олардың үстінен полиция қылмыстық іс қозғады деп хабарлайды Orda.kz.

Lada.kz ақпаратына сүйенсек, бейнежазбаға қоса, кәмелетке толмаған қыздың бірінің анасы жазған аудиожазба бар. Онда 19-21 жас аралығындағы қыздардан құралған топ жасөспірімдерді айналасына жинап, қыздарды ұрып-соғып, оларды қорқытып, буллинг ұйымдастыратынын айтады.

«Қызым ақымақтықпен солардың тобына қосылып кетті. Олар сауда орталықтарында қыздармен танысып, әдемі екендерін айтып, достық ұсынады. Балалар олармен араласа бастайды, ал содан кейін оларға ықпал етіп, қорқыту мен манипуляцияға көшеді. Олар қыздарды ұрып-соғады және бұл әрекеттерін камераға түсіріп, әлеуметтік желіге жүктейді», – деп баяндады қыздардың бірінің анасы.

Кадрларда бір қыздың жасөспірімді жұдырықпен ұрып, басынан соққаны анық көрінеді.

Полицияның баспасөз қызметінің мәлімдеуінше, осы оқиғаға қатысы бар қыздар табылды, полицияға жеткізілді. Сондай-ақ, кәмелетке толмағандардың құқықтарын қорғау және олардың қауіпсіздігін қамтамасыз ету жөніндегі міндеттерін орындамағаны үшін олардың заңды өкілдері әкімшілік жауапкершілікке тартылады.

«Материалдар кәмелетке толмағандардың құқықтарын қорғау жөніндегі комиссияға жолданады. Құқық бұзушылар профилактикалық есепке қойылды. Қазіргі уақытта оқиғаның мән-жайын анықтау мақсатында жан-жақты тергеу амалдары жүргізіліп жатыр»,  деп мәлімдеді полиция басқармасы.