Ақтауда апатқа ұшыраған ұшақ экипажына «Ұлт батыры» атағы берілді

Әзірбайжан президенті Ильхам Әлиев Embraer-190 жолаушылар ұшағының апаты кезінде жоғары кәсібилік пен батылдық танытқан азаматтарды марапаттау туралы жарлыққа қол қойды, деп хабарлайды Orda.kz.

Caliber.az ақпараты бойынша Баку–Грозный рейсінде болған қайғылы оқиға ел тарихында батырлық пен бірліктің көрінісі ретінде есте қалмақ.

Әзірбайжан басшысының жарлығына сәйкес, Игорь Кшнякин, Александр Кальянинов және Хёкюма Алиеваға қайтыс болғаннан кейін «Ұлт батыры» атағы берілді. Бұл атақ елдің ең жоғары мемлекеттік марапаты және ерекше ерліктер мен жанқиярлық әрекеттер үшін беріледі.

Сонымен бірге, Зульфугар Асадов пен Айдан Рагимли бірінші дәрежелі «Рашадат» орденімен марапатталды. Бұл марапат азаматтардың қызметі мен ерлігін мойындаудың жоғары деңгейі ретінде танылды.

25 желтоқсанда AZAL әуе компаниясының Embraer-190 ұшағы Баку–Грозный рейсін орындау барысында Ақтау маңында апатқа ұшырады. Ұшақта 62 жолаушы және 5 экипаж мүшесі болды. Қайғылы оқиға салдарынан 38 адам қаза тауып, 29 адам аман қалды.

Алғашқы тергеу болжамдарына сәйкес, апаттың негізгі себептері ретінде қалың тұман, техникалық ақаулар және ұшақтың бағытына әсер еткен әуе қорғанысы операциялары аталды. Айта кетсек, оқиға кезінде ресейлік әуе қорғаныс жүйелері украиналық дрон шабуылдарын қайтару жұмыстарын жүргізіп жатқан еді.

Ильхам Әлиев қаза тапқандардың отбасыларына көңіл айтып, апаттан аман қалғандарға жан-жақты қолдау көрсетуді тапсырды. Мемлекет басшысы ұшқыштар мен экипаж мүшелерінің кәсібилігін ерекше атап өтіп, олардың соңғы сәтке дейін өз міндеттерін адал орындағанын айтты.