Ақтауда 5 баланың әкесі қыздарды құтқарамын деп суға батып кетті

Ақтауда 5 баланың әкесі суға батып бара жатқандарды құтқарамын деп өзі суға кетіп, қайтыс болды, деп хабарлайды Orda.kz.

Марқұмның жақындарының айтуынша, оқиға болған күні Ерлан Шонтабаев достарымен бірге теңіз жағасында демалып жүрген. Сол маңда екі қыз бен екі жігіт те суға шомылып жатқан. Бір сәтте қыздардың екеуі суға бата бастаған, бұл жағдайды көрген жігіттердің бірі суға секіріп, қыздарға көмектеспек болған. Ал екіншісі жанындағы адамдардан жанұшыра көмек сұрай бастапты.

Оны көрген Шонтабаев еш ойланбастан суға секіріп, қыздарды құтқаруға кірісіп кеткен екен. Қыздарды құтқарып үлгергенімен жігітті алып шығуға барған кезде сол жігітпен бірге суға батып кеткен. 

Маңғыстау облысы ТЖД басшысының атынан марқұмның отбасына алғыс хат табыс етілді.