Ақтау маңындағы AZAL ұшағының апаты: ИКАО Қазақстанның жұмысын жоғары бағалады

AZAL ұшағының Ақтау маңында апатқа ұшырауын тергеу аясында Халықаралық азаматтық авиация ұйымы (ИКАО) Қазақстанның жұмысын жоғары бағалады, деп хабарлайды Orda.kz.

Премьер-министрдің орынбасары Қанат Бозымбаев Халықаралық азаматтық авиация ұйымының Еуропа және Солтүстік Атлантика бюросының директоры Николя Раллоумен кездесті.

Бозымбаев Қазақстанның алғашқы күндерден-ақ апаттың объективті және жан-жақты тергелуіне басымдық бергенін атап өтті. Өз кезегінде Ралло қазақстандық тараптың алдын ала есепті жедел дайындағанын жоғары бағалады. Ол халықаралық авиациялық стандарттарды сақтау маңызды екенін айтты.

«Қазақстан мен тергеу комиссиясының осы алдын ала есепті апаттан кейін бір жарым айға жетпей аяқтау үшін жасаған күш-жігерін атап өткім келеді. Тергеу жалғасып жатқан кезде халықаралық азаматтық авиация туралы конвенцияны сақтауды жалғастыруға шақырамын», – деді Николя Ралло.

Бозымбаев Халықаралық азаматтық авиация ұйымына қолдау көрсеткені және апат себептерін анықтауға тәуелсіз сарапшы Тормодур Тормодссонның қатысқаны үшін алғыс айтты.