Ақтау қаласы әкімінің экс-орынбасарына іздеу салынды

Солтүстік Қазақстан облысы бойынша экономикалық тергеу департаменті Ақтау қаласы әкімінің бұрынғы орынбасары Тимур Сәдуақасовқа іздеу салды, деп хабарлайды Orda.kz.

Құқықтық статистика және арнайы есепке алу порталы Сәдуақасовқа 5 ақпаннан бері іздеу жарияланғанын мәлімдеді. 

СҚО-дағы заңсыз пайдалы қазбалар өндіру ісі бойынша Тимур Сәдуақасовтың есімі төрт күдіктінің бірі ретінде аталды. Бұл істегі негізгі айыпталушылар — Обухов тау-байыту комбинатының тең төрағасы Виктор Долгалев пен оның ұлы Данил Долгалевке жер қойнауын өз бетінше пайдаланғаны және заңсыз кәсіпкерлікпен айналысқаны үшін айып тағылған. Ал Тимур Сәдуақасов  пен Санат Құрманбаев пара беруге итермелеу және алаяқтық баптары бойынша айыпталып отыр. 

Экс-орынбасар «Әділет» жоғары құқық мектебін заңгер мамандығы бойынша бітірген. Ол Көкшетау экономика және менеджмент институтының қаржы бакалавры мамандығын оқыпты. Тимур Сәдуақасов 2019 жылдың ақпанында Ақтау әкімінің орынбасары болып тағайындалған.