Ақтау әуежайынан жаңа әуе рейстері ашылады

Бүгінгі таңда Ақтау халықаралық әуежайы арқылы сегіз ішкі және 13 халықаралық әуе қатынасы жүзеге асырылуда, деп хабарлайды Маңғыстау облысының қоғамдық коммуникациялар орталығы.

Маңғыстау облысының жолаушылар көлігі және автомобиль жолдары басқармасы басшысының орынбасары Берік Ізғалиевтің айтуынша, 2024 жылдың алты айында Ақтау әуежайы арқылы жолаушылар санының өсуі байқалады.

Мәселен, егер 2023 жылдың алты айының қорытындысы бойынша 678 320 жолаушы болса, 2024 жылы – 755 254 жолаушы.

"2024 жылдың алты айының қорытындысы бойынша кейбір жұмыстар жүргізілді. Жаңа рейстерге келетін болсақ, біз халыққа қолжетімді бағаларды ұсынатын боламыз. Бұдан басқа, теміржол көлігі саласында Маңғыстау – Семей бағытында 33 вагон, Маңғыстау – Алматы бағытында 90 вагон, Атырау бағытында 36 вагон, Орал бағытында 20 вагон, Ақтөбе бағытында тоғыз, Бейнеу бағытында сегіз вагон жаңартылды. Автомобиль көлігімен жолаушылар тасымалы саласына келетін болсақ, бүгінгі таңда Маңғыстау облысында тұрақты автомобиль жолаушылар тасымалына 16 тасымалдаушы, 48 маршрут, 292 бірлік автокөлік тартылған. Жаңартылған автобустардың үлесі 80% құрайды", - деді Берік Ізғалиев.