«Ақша сұраған»: Жамбыл облысында тәрбиеші әйелді ауылдасы өлтіріп кетті

Жамбыл облысындағы балабақшалардың бірінде тәрбиеші болып істейдін әйел өлі табылды, деп хабарлайды Orda.kz Halyqstan-ға сілтеме жасап. 

Марқұм екі күн бұрын Таразға барып, сол күйі жоғалып кеткен. Әуелі тәрбиешіні жұбайы мен ұлы іздей бастаған. Бірақ нәтиже болмағаннан кейін, полицияға хабарласты.

Сол күні кешке тәрбиешінің үйіне жақын маңда зорлық-зомбылық белгілері бар әйелдің денесі табылды. Ақпаратқа сәйкес, ол басына тиген тас соққысынан қайтыс болуы мүмкін. Мұны дененің жанынан табылған қанды тас дәлелдейді.

Полиция қылмыстық іс аясында тиісті сараптамалар тағайындалғанын мәлімдеді. Аудан аумағында бұрын сотталған адамдардың, оның ішінде ауыр, аса ауыр, психикалық бұзылулары бар есепте тұрған адамдар түгел тексерілді. 

Полицейлер әйелді өлтірген 34 жастағы жергілікті тұрғынды анықтады. Күдікті қылмыс жасау кезінде мас болған екен. Ол әйелді көріп, одан ақша сұрай бастаған. Әйел қашуға әрекет жасағанда, ер адам таспен басынан бірнеше рет ұрып, құлатқан. Кейін қолындағы екі алтын сақинасын шешіп алып кетіпті. 

Күдікті қамауға алынды.