АҚШ-тан пошта арқылы Қазақстанға есірткі заттары жеткізілді

Қазақстанға АҚШ-тан дәрі-дәрмек тасымалдайтын пошта арқылы есірткі заттары жеткізілген, деп хабарлайды Orda.kz.

«Қаржы мониторингі агенттігі Алматыда АҚШ-тан пошта сәлемдемелері түріндегі есірткінің ірі партиясының келгенін анықтады. Қазіргі уақытта сотқа дейінгі тергеу амалдары жүргізілуде. Қазақстан Республикасының он азаматы ұсталып, уақытша ұстау изоляторына қамалды», - деді АФМ өкілі Әлібек Әбділов.

Олар Алматы, Петропавл, Семей, Көкшетау, Шымкент және Өскемен қалаларында ұсталды. Қазақстандықтар АҚШ-тан тұтыну тауарлары деген желеумен құрамында есірткі заттары («марихуана» және «каннабис сығындысы») бар поштаны әрі қарай елде сату мақсатында алдырған.

Нәтижесінде заңсыз айналымнан 8 келіге жуық кептірілген марихуана және 15 келіге жуық каннабис сығындысы (гашиш майы) тәркіленді.