АҚШ-та қос жатырлы әйел егіз баланы дүниеге әкелді

АҚШ-тың Алабама штатында қос жатыры бар әйел екі қыз баланы дүниеге әкелді. Оның үстіне әр бала бөлек құрсақта дамып жетілген, деп хабарлайды Orda.kz.

The Guardian басылымының хабарлауынша, 32 жастағы Келси Хэтчерді 20 сағат бойы толғақ қысқан. Дәрігерлер жүктіліктің 39-аптасында босануға ауруханаға шақырған. 

Басылым әйелге әдеттегіден екі есе көп дәрігер қажет болды деп жазады. Бір қызығы дәрігерлердің әр бригадасы әр жатырдың жағдайын жеке-жеке бақылап отырған.

Ең қызығы егіздердің  екі бөлек құрсақта жетілгенінен бөлек олардың туған күндері де әртүрлі болды. Біріншісі сейсенбі күні кешке, екіншісі сәрсенбі күні таңертең дүниеге келген. Босану Алабама университеті ауруханасы дәрігерлерінің жіті бақылауымен өтті.

Дәрігерлер мұндай жүктілік миллионнан бір  жағдайда ғана болатынын айтады. Дегенмен, дәрігерлердің айтуынша, нәрестелерді көтеру мен жүктілік әдеттегідей өткен.

Әйел өзінің қос жатыры бар екенін  17 жасында білген. Бұл  босану әйелдің төртінші рет бала көтеруіне қатысты. Бұған дейінгі жүктіліктерінде нәресте тек бір жатырда болған.