АҚШ соққы берді: Венесуэла астанасында әуе шабуылына қарсы қорғаныс жүйесі қосылды

Бүгін түнде АҚШ Венесуэла аумағына әуе соққыларын жасады. Ел астанасы Каракаста жарылыстардың дыбысы естіліп, аспанда әуе шабуылына қарсы қорғаныс жүйесінің (ӘШҚҚ) жұмысы тіркелді. АҚШ президенті Дональд Трамп арнайы операцияның басталғаны туралы ресми мәлімдеме жасаған жоқ, деп хабарлайды Orda.kz Reuters агенттігіне сілтеме жасап.

Жергілікті тұрғындардың айтуынша, соққы Каракастың оңтүстік бөлігіндегі Форт-Тиуна ауданы мен генералиссимус Франсиско де Миранда атындағы әуе базасына бағытталған. Алдын ала мәлімет бойынша, астана аумағында кемінде он нысан зақымданған.

Сонымен қатар елдің солтүстігіндегі Варгас штатында орналасқан Ла-Гуайра әскери-теңіз базасы да соққыға ұшыраған. Бұл жерде әскери-теңіз күштерінің академиясы орналасқан.

Куәгерлер аспанда америкалық десанттық тікұшақтардың пайда болғанын жазуда. Бұған жауап ретінде Венесуэла әуе күштері Су-30МКВ жойғыш ұшақтарын дабыл бойынша көтеріп, оларды АҚШ ұшақтары мен тікұшақтарын тосқауылдауға жіберген. Әуе кеңістігінде Chinook үлгісіндегі ауыр көлік тікұшақтары да байқалған.

Фото әлеуметтік желіден.

Жергілікті бұқаралық ақпарат құралдарының хабарлауынша, астанада атыс дыбыстары естілуде — алдын ала дерек бойынша, америкалық десант түсірілген.

АҚШ пен Венесуэла арасындағы қарым-қатынастағы шиеленіс өткен жылдан бері күшейе түскен. Желтоқсан айында Дональд Трамп Латын Америкасындағы бұл елдің басшылығын «активтерді ұрлайды, терроризммен, есірткі контрабандасымен және адам саудасымен айналысады» деп айыптап, террористік ұйым деп жариялаған болатын.

Жарияланым кезінде Венесуэла мен АҚШ-тың ресми билік өкілдері бұл жағдайға қатысты пікір білдірген жоқ.