АҚШ, Ресей және Қытай 2022 жылдан бері алғаш рет Украина бойынша қарарға бірге дауыс берді

БҰҰ Қауіпсіздік кеңесі АҚШ ұсынған Украина жөніндегі қарарды қабылдады. Үш абзацтан тұратын мәтінде агрессияны айыптау жоқ, тек бейбітшілікке шақыру бар, деп хабарлайды Orda.kz.  

Қарарды 10 ел қолдады – АҚШ, Қытай, Ресей, Алжир, Гайана, Сьерра-Леоне, Оңтүстік Корея, Пәкістан, Панама, Сомали. Бес ел қалыс қалды – Ұлыбритания, Франция, Грекия, Словения, Дания. 

БҰҰ-ның  қарарында «Ресей-Украина қақтығысы» құрбандарына қайғы білдіріліп, ұйымның халықаралық бейбітшілік пен қауіпсіздікті сақтау жөніндегі міндеттемесі расталды. Құжат тез арада тұрақты бейбітшілік орнатуға шақырады.  

Ассамблея тағы екі қарарды қабылдады біріншісі – Украина мен еуропалық елдер әзірлеген, екіншісі – АҚШ ұсынған, бірақ Украинаға қолдау білдіретін түзетулер енгізілгеннен кейін өзгертілген құжат. Reuters агенттігінің пікірінше, бұл дипломатиялық тұрғыдан Киев пен оның еуропалық одақтастарына Вашингтон алдында артықшылық берді.