АҚШ пен Иран Ормуз бұғазын аша тұрып, бітімді ұзартуға келісті

Екі елдің келіссөз жүргізушілері ядролық бағдарлама бойынша келіссөздерді бастау және атысты тоқтату туралы 60 күндік меморандум жобасын келісті, деп хабарлайды Orda.kz.

Axios басылымының мәліметінше, құжат келіссөзге қатысушылар жағынан қолдау тапқанымен, әзірге Дональд Трамп пен Иран басшылығы  түпкілікті мақұлдамаған.

Келісім Ормуз бұғазы арқылы кемелердің баж салығынсыз және ирандық әскери күштердің кідірісінсіз еркін өтуін қарастырады. Тегеран 30 күн ішінде бұғаздағы барлық миналарды алып тастауы тиіс, ал АҚШ теңіз блокадасынан біртіндеп бас тартуға міндеттеледі. Сонымен қатар болашақ келіссөздердің негізгі тақырыптарының бірі – Иранның жоғары байытылған уранын жою мәселесі болмақ.

Бітімге қатысты келіссөздерге қарамастан, соңғы күндері тараптар бір-біріне соққы жасауды жалғастырды. Жуырда Ислам революциясы сақшылар корпусы Бендер-Аббас маңындағы АҚШ әрекеттерінен кейін америкалық әуе базасына шабуыл жасағанын мәлімдеді, ал Вашингтон ирандық дрондардың жойылғанын хабарлады.

Қақтығыс басталғалы бері Трамп пен оның командасы Иранмен жақын арада келісімге қол жеткізілетінін бірнеше рет айтқанымен, нақты келісім әзірге жасалған жоқ.

Оқи  отырыңыз:

• Иран мен АҚШ арасындағы бітімгерлік соңғы кезеңге жетіп қалды
• Иран Ормуз бұғазы арқылы Қытай кемелерінің өтуіне рұқсат берді
• Иран АҚШ-қа 14 тармақтан тұратын бейбіт жоспар жолдады