АҚШ Иранға соққы жасамайтын болды: Тараптар келіссөзге уағдаласты

Иран сыртқы істер министрі Аббас Аракчи Иранның АҚШ-пен ядролық келіссөздерге қатысты ұстанымы туралы мәлімдеме жасады. Келіссөзді бастауға Иран президенті Масуд Пезешкиан тапсырма берген, деп хабарлайды Orda.kz. 

Иран келіссөздерді тек ядролық мәселемен шектегісі келеді. Аббас Аракчи АҚШ президенті Дональд Трамптың «Иранда ядролық қару болмауы тиіс» деген мәлімдемесімен толықтай келісетінін айтып, Тегеран ядролық бағдарламасының бейбіт мақсатын кепілдендіруге дайын екенін мәлімдеді.

Осы орайда, Тегеран мен Вашингтон арасындағы келіссөздер алдағы күндері басталады деген болжам бар. Аббас Аракчи мен АҚШ президентінің арнайы өкілі Стив Уиткофф жолығуы мүмкін. Келіссөздердің нақты орны мен уақыты әзірге белгісіз.

Сонымен қатар, Аракчи Иранның уранды байыту құқығы мойындалған жағдайда, келіссөздердегі өзге шарттарды талқылауға дайын екенін атап өтті. Оның сөзінше, дәл осы шарт орындалса, келіссөз форматы кедергі болмайды.

Айта кетейік, бұған дейін Трамптың арнайы өкілі Иранмен қақтығысты реттеудің төрт шартын атаған еді. 
Шарттардың ішінде ол уранды байыту, Тегеранның зымырандар мен ядролық материалдар қорын қысқарту, сондай-ақ кепілдікті қамтамасыз ету тақырыбын атады. Дональд Трамптың арнайы өкілі Иранда қазір әр түрлі мәліметтер бойынша 3,67-60 пайызға байытылған екі мың келіге жуық ядролық зат бар деп мәлімдеді.