Ақмола облысының мемлекеттік қызметшілері жарты жылда қызметтік көлікпен 200 рет жол қозғалысы ережесін бұзған

Ақмола облысының мемлекеттік қызметшілері жарты жыл ішінде жұмыс көліктерімен жол жүру ережесін 200-ден астам рет бұзған, деп хабарлады Қазақстан Республикасы Мемлекеттік қызмет істері агенттігінің Ақмола облысы бойынша департаменті.

«Бірінші жартыжылдықта қызметтік көлік құралдарын басқару кезінде жол қозғалысы ережелерін бұзған тұлғаларды әкімшілік жауапкершілікке тартудың 201 фактісі анықталды. Жалпы 112 адам жауапкершілікке тартылды», - деді ведомство басшысы Думан Әбілев

Орталық мемлекеттік органдардың және жергілікті атқарушы органдардың аумақтық бөлімдерінде 800-ден астам қызметтік көлік бар.

Тексеруден кейін 400 мың теңге іссапарлар үшін заңсыз төленгені анықталды. Ақпаратты зерделеу қорытындысы бойынша департамент қызметтік көліктерді жұмыстан тыс уақытта пайдаланудың 21 фактісін анықтады.

Жалпы 13 тұлға, оның ішінде тоғызы қызметтік көлікті жеке мақсатта пайдаланғаны үшін, екеуі мемлекеттік орган басшылары тарапынан тиісті бақылау болмағаны үшін, екеуі іссапар шығындарын негізсіз төлеуге және кәсіпкерлік қызметті дұрыс ресімдемеуге байланысты және басқа да құқық бұзушылықтар үшін тәртіптік жауапкершілікке тартылды.