Ақмола облысындағы жолда 16 көлік соқтығысты

Жол апатынан 28 жастағы жүргізуші қайтыс болды, зардап шеккен бес адам ауруханаға жеткізілді. 

Ақмола облыстық ІІД баспасөз қызметінің хабарлауынша, 29 желтоқсанда «Астана-Петропавл» тас жолының 105-ші шақырымында «Гелиос» жанар-жағармай құю бекетінің маңында ірі жол апаты болған.

«Сағат 13:18-де Ақкөл аудандық ІІБ-нің кезекші бөліміне ірі жол-көлік оқиғасы болып, қайтыс болған адам бар деген телефон хабарлама келіп түсті. Оқиға орнына жеткен тәртіп сақшылары бұған дейін жол-көлік оқиғасы салдарынан 16 көлік, оның ішінде үш «Газель», төрт жүк көлігі және тоғыз жеңіл көлік зақымдалғанын анықтады. Өкінішке қарай, көліктің 28 жастағы жүргізушісі оқиға орнында көз жұмды. Түрлі жарақат алған бес зардап шегуші Ақкөл аудандық ауруханасына жеткізілді» деп түсіндірді департаменттегілер.

Облыс полицейлері Қазақстан Республикасы Қылмыстық кодексінің 345-бабының 3-бөлігі «Абайсызда адам өліміне әкеп соққан көлік құралдарын басқаратын адамдардың жол жүруі немесе көлік құралдарын пайдалану ережелерін бұзуы» бойынша сотқа дейінгі істі бастады.