Ақмола облысындағы «Таза Қазақстан» акциясына БАҚ өкілдері қатысты

Елімізде «Таза Қазақстан» республикалық экологиялық акциясы жалғасуда. Бүгін Көкшетауда оған БАҚ өкілдері қатысып, әрқайсысы журналистерге арналған жаңа аллеяға жеке ағаш отырғызды.

Акцияға облыстық және қалалық БАҚ-тан басқа, республикалық басылымдардың меншікті тілшілері де қатысты.

Журналистер бірауыздан Көкшетау қаласының орталық саябағы аумағында пайда болған жаңа аллеяға ағаш көшеттерін отырғызды. Экологиялық акцияға қатысушыларды Ақмола облыстық ішкі саясат басқармасының орынбасары Гүлмира Кәрімова қарсы алды.

«Құрметті әріптестер, журналистер, редакторлар және журналистика саласының ардагерлері, бүгінде еліміздің барлық өңірлерінде Мемлекет басшысының тапсырмасымен облысымызда экологиялық шаралар белсенді өтуде флешмобтар мен басқа да акцияларды ұйымдастыру мақсатында қалалық ішкі саясат басқармасының бастамасымен ашылатын журналистердің жеке аллеясына  барлықтарыңызды шақырдық», – деді Гүлмира Тоқтарқызы.

Акция облыстағы журналистер бауырластығын арттыра түсті. Енді әркімнің ұрпақтан-ұрпаққа басылым тарихын жеткізіп, отансүйгіштікке, туған жерге, оның табиғатына деген сүйіспеншілігін оятатын өз ағашы бар.

Жиналғандардың айтуынша, бұл оқиға Ақмола облысы журналистикасының тарихында қалатын жақсы жаңалық.  Өйткені отырғызылған ағаштар экологиялық акцияға қатысқан әрбір адамның тарихын ұрпақтан-ұрпаққа жеткізеді деп сенеді қатысушылар.

Жалпы «Таза Қазақстан» экологиялық акциясына қаладағы 30-дан астам БАҚ өкілдері қатысты.