Ақмола облысында шетелдіктер мінген автобус қарлы боранда жолда бұзылып қалды

Ақмола облысында Астана – Петропавл республикалық тас жолында Ресейдің Сүргіт қаласынан келе жатқан тұрақты автобус істен шықты. Көлікте Тәжікстанның 65 азаматы болған, деп хабарлайды Orda.kz.

Автобус 14 қаңтарға қараған түні жол үстінде бұзылған. Ол Астана-Петропавл тас жолымен Ресейдің Сүргіт қаласынан келе жатқан.

Жүргізуші мен Тәжікстан азаматтары, барлығы 65 жолаушы қарлы боранда көлік қозғалысы жабылған тас жолда қалып қойған.

«Шетелдіктерге көмек көрсету үшін полиция аға лейтенанттары Азамат Төлегенов пен Нұрсұлтан Сағындықов бар «Бақай» патрульдік полиция ротасының экипажы келді. Полиция оқиға туралы төтенше жағдайлар департаменті мен жергілікті атқарушы билікке хабарлаған. Содан кейін олар автобусты тексеріп, бұзылу себебін жылдам анықтады. Тәртіп сақшылары жүргізушілермен бірлесе отырып, көлікті орнында жөндеп, автобусты Ақкөл қаласындағы жақын жердегі жылу пунктіне дейін шығарып салды» деп хабарлады полицейлер.

Шетелдіктер Ақкөлде жол ресми ашылып, қозғалыс қалпына келгенше бола алады.