Ақмола облысында «қара кеншілер» 130 миллион теңгенің алтынымен ұсталды

Ақмола облысында 130 миллион теңгенің алтынымен заңсыз кеншілікпен айналысқан бір топ шахтер ұсталды, деп хабарлайды Orda.kz.

Полицияның мәліметінше, ұсталғандар Степногорск қаласындағы алтын өндіретін кәсіпорында жұмыс істеген.

«Қылмыстық топ құрамында сол кәсіпорынның технологиялық учаскесінің бригадирі басқарған дайын өнім цехының жұмысшылары болған. Олар өздерінің жұмыстағы мүмкіндіктерін пайдалана отырып, Ақсу кенішіндегі алтын рудасын білдірмей ұрлау жүйесін құрмақшы болған», - деді полициядағылар.

«Кеншілер» бейнекамераларға түспейтін жерлерді пайдаланып,  жұмыс киімдеріне жасырынған қазба байлықты алып шықпақшы болған.

«Ұсталғандардан құрамында 4,5 келі таза алтыны бар жеті келіге жуық концентрат тәркіленді. Бұл ақшалай есептегенде 130 миллион теңгеден асады. Қылмыстық топ мүшелері ұсталып, уақытша ұстау изоляторына қамалды. Аса ірі көлемдегі ұрлық бойынша сотқа дейінгі тергеу амалдары жүргізілуде», - деп қосты полицейлер.