Ақмола облысында экстремизм мен терроризмді насихаттағаны үшін сегіз адам сотталды

Ақмола облысында экстремизм мен терроризмді насихаттағаны үшін Қазақстанның жеті азаматы мен бір шетелдік сотталды.

Бұл туралы Ұлттық қауіпсіздік комитеті хабарлайды.

«Ұлттық қауіпсіздік комитеті Қазақстанның жеті азаматы мен бір шетелдікке қатысты діни-экстремистік ұйымның қызметін ұйымдастыру және оған қатысу, сондай-ақ терроризмді насихаттау фактілері бойынша қылмыстық істі тергеуді аяқтады. Тергеу барысында сотталғандардың айналасындағылардың арасында идеологияны таратқаны, зайырлы өмір салты мен конституциялық құрылысқа өшпенділік ұялатқаны анықталды» делінген хабарламада.

Олардың тұрғылықты жерінде жүргізілген тінту кезінде айтарлықтай көлемдегі діни-экстремистік әдебиеттер мен басқа да заттай айғақтар тәркіленгені атап өтілді.

Сотталғандардың үшеуі бұрын осыған ұқсас қылмыс жасағаны үшін сотталғаны көрсетілген.

«Ақмола гарнизоны әскери соты оларды бір жылдан сегіз жылға дейінгі мерзімге бас бостандығынан айыру жазасына кесті» делінген хабарламада.

2024 жылдың 2 сәуірінде үкім заңды күшіне енді.