Ақмола облысында балықшы мұз астына түсіп кетіп, көз жұмды

Ақмола облысында балық аулауға шыққан қарт кісі мұз астына түсіп кетіп көз жұмды, деп хабарлайды Orda.kz.

Қайғылы оқиға Шортанды ауданында болды. 70 жастағы зейнеткер мұз үстінде балық аулап отырғанда аяқ астынан мұз жарылып кеткен. Қария суға құлап түскен.

Құтқарушылар су айдынындағы мұздың қалыңдығы небәрі 5 сантиметр болғанын атап өтті.

«Ауа райы болжамына сәйкес, қараша айының соңына дейін құбылмалы ауа райы болады. Осыған байланысты мұз қалыңдамайды. Сондықтан барлық балық аулайтын адамдар және ата-аналар мен балалардан мұзға шықпауды сұраймыз», – деді Ақмола облысы ТЖД ресми өкілі Ерсайын Қойшыбаев.

Айта кетейік, 11 қараша күні Жамбыл облысында мектеп оқушылары тамақтан уланды.