Ақмола облысында 730 миллион теңгеге қазандық сатып алмақ болды

Ақмола облысындағы аудан әкімдігі 730 миллион теңгеге заңсыз қазандық сатып алмақ болды. Прокуратура мемлекеттік сатып алулар бойынша заң бұзушылықтарды анықтады.

Ақмола облысының прокурорлары 730 миллион теңге бюджет қаражатының негізсіз жұмсалуының жолын кесті, деп хабарлайды ведомствоның баспасөз қызметі.

«Ауданның жергілікті атқарушы органы жылдық мемлекеттік сатып алу жоспарында блок-модульдік қазандықты бәсекелестіксіз тәсілмен, яғни тікелей шарт жасасу арқылы бір көзден алу тәсілімен сатып алуды көздегені анықталды» делінген хабарламада.  

Облыстық прокуратурада түсіндіргендей, прокурорлық қадағалау актісімен аталған сатып алудың күші жойылып, ашық конкурс арқылы сатып алуды ұйымдастыруға қатысты жылдық жоспарға өзгерістер енгізілді.

«Аудандық прокуратура алдын ала 730 млн теңгеге заңсыз сатып алудың жолын кесіп, кәсіпкерлік субъектілерінің ашық конкурсқа бәсекеге қабілетті болуын қамтамасыз етті» деп қосты прокуратура.