Ақмарал Әлназарова сотта мәжіліс депутаты Базарбекке қарсы сөйлей ме?

Денсаулық сақтау министрі Ақмарал Әлназарова ведомствоның Мәжіліс депутаты Бақытжан Базарбекке қатысты сот процесіне қатыспайтынын мәлімдеді, деп хабарлайды Orda.kz.

Әңгіме мəжілісменге қарсы іскерлік беделді қорғау туралы талап-арыз жөнінде болып отыр. Арызды елордалық медициналық ұйым берген.

Бұған дейін Базарбек жеке медициналық ұйымдарды бюджет қаражатын мақсатсыз жұмсау және лицензиясыз қызмет көрсету сияқты ауыр заңбұзушылықтар жасаған деп көпшілік алдында айыптаған болатын.

Журналистердің сұрағына жауап берген денсаулық сақтау министрі ведомствоның дауға тікелей қатысы жоқ екенін атап өтті. Оның айтуынша, бұл іс жеке субъект пен міндетті әлеуметтік медициналық сақтандыру қоры арасындағы текетірес.

«Денсаулық сақтау министрлігі қандай да бір тараптың қатысушысы болмайды. Мұнда жеке субъект пен МӘМС қоры арасындағы мәселе қаралып жатыр. Министрлік бұл процеске қатысуды жоспарламайды», — деді Әлназарова Үкіметтегі брифингте.

Еске сала кетсек, Мәжіліс депутаты Бақытжан Базарбек 2020 жылғы 24 желтоқсандағы денсаулық сақтау министрінің бұйрығын сынға алған болатын. Бұл бұйрыққа сәйкес, медициналық көмек көлемін қолдан көбейту, жалған есеп жасау және басқа да заңбұзушылықтар ұрлық ретінде емес, «дефект» ретінде қарастырылады. Депутаттың айтуынша, бұл тетіктер бюджет қаражатын жымқыру фактілерінде де қылмыстық жауапкершіліктен жалтаруға мүмкіндік береді.