Ақмарал Әлназарова медицинаның кем-кетігін айтты

Министр медициналық ұйымдарда кредиторлық берешек бола тұра сыйақы төленгенін мәлімдеді, деп хабарлайды Orda.kz порталы.

«Жамбыл облысында 758,1 млн теңге қаражатқа қалалық көпбейінді ауруханада қаражатты жымқыру фактісі анықталған. "СҚ-Фармация" алдында дәрілік заттар үшін төлеуге арналған қаражат орындалған жұмыс актілерінсіз заңды тұлғаға аударылған», - деді министр Мәжілісте өткен комитет отырысында.

Осыдан кейін Денсаулық Сақтау Министрі еңбекке ақы төлеу қорының негізсіз төлемдеріне де тоқталды.

«Кредиторлық берешек бола тұра сыйақы төлеу және 694 млн теңге көлеміндегі лауазымдық айлықтарды ұлғайту фактілері анықталды. Мысалы, Алматы қаласының бірінші көпбейінді ауруханасының бөлімше меңгерушісінің жалақысы 357 мың теңге болғанда 11 ай үшін 15 млн теңге төленді. Сондай-ақ, аға мейірбике жалақысы 185 мың теңге болған кезінде 7 млн теңге қаржыдан төленді. Жамбыл облысының қалалық көпбейінді ауруханасының кредиторлық берешегі бола тұрып, 391 млн теңгеге сыйақы төлеген», - деп жалғастырды ол. 

Оның сөзінше, аталған деректер Антикор күшімен анықталған.

«Жетісу облысында бас дәрігерлер мен есепшілерге 389 млн теңге қаржыға ынталандыру үстемелері заңсыз төленген. СҚО, Павлодар облысында және Астана қаласында 332,9 млн теңге көлеміндегі қаржы жымқыру фактілері де анықталды. Алматы қаласындағы ауруханалардың бірінде бас бухгалтер басқа біреудің деректерін енгізу арқылы өз шотына 341 млн теңге аударған. Осындай жағдай Абай және Маңғыстау облыстарында да болған. Атырау облысында емхананың бас дәрігері 171 млн теңге жымқырған. Бұл тек сыбайлас жемқорлыққа қарсы қызмет тарапына іріктеп тексеру жүргізгеннің нәтижесінде белгілі болды. Олар бойынша негізсіз төлемдер бүгінде 1,3 млрд теңге болады», - деді ДСМ басшысы. 

Құқық қорғау органдарына медициналық қызметкерлерге қатысты 16 материал жіберілген.