«Әкімшіліктегілер памперс киіп жүр»: желідегі жазбасы үшін сотталған азаматтың жазасы ауырлауы мүмкін

Түркістан облысында 70 жастағы азаматтық белсенді Әуелбек Шонжанның жазасы қатаңдатылуы мүмкін, деп хабарлайды Orda.kz Азаттыққа сілтеме жасап. 

Кеше, 9 қаңтар күні Түркістан облыстық сотында прокурор «Көрінеу жалған ақпарат тарату» бабымен (274-бап) бір жарым жылға шартты жазаға сотталған 70 жастағы азаматтық белсенді Әуелбек Шонжанның жазасын қатаңдатуды сұрады. Әуелбек Шонжан Facebook парақшасында «ауыл шаруашылығы мақсатындағы жерлердің қытайларға беріліп жатқаны» жөнінде жазған.

Арыс қалалық соты Шонжанға қатысты үкімді 2024 жылдың 24 қыркүйегінде шығарған еді. Жәбірленуші ретінде Арыс қалалық ауыл шаруашылығы бөлімінің басшысы мен қалалық жер қатынастары бөлімінің басшысы танылған.

Мәліметтерге сүйенсек, Әуелбек Шонжан 2024 жылдың наурыз айында Facebook парақшасында Анық Жақып ауылына қарасты ауыл шаруашылығы мақсатындағы жердің қытайға беріліп жатқаны жөнінде жазба жариялаған.

Оған қоса «Бүгін қытайлардың ауыл шаруашылығы жерлеріне «ие» болуы Арыс қаласынан бастау алса ары қарай тегістей Түркістан, Қызылорда облысы... сонда нең қалмақ, отандастар» деп «қоғамдық тәртіпті бұзу, жер, ауыл шаруашылығы саласына қатысты мемлекеттік мекемелердің құқықтары мен заңды мүдделеріне елеулі зиян келтіру қаупін төндіріп, көрінеу жалған ақпарат таратқан».

Азаматтық белсенді Қытай азаматтарына заңсыз жер беріліп жатқаны туралы теріс ой қалыптастыраған.

Прокурор қалалық сотта Шонжанның жазған мәтіні қоғамға қауіпті ой туғызғанын айтады. Сондықтан прокурор соттан жазаны қатаңдатып бас бостандығынан айыруды, қосымша жаза ретінде қоғамдық-саяси қызметпен және әлеуметтік желіде публицистикалық қызметпен айналысуға тыйым салуды сұрады.

Азаматтық белсенді бұл айыптармен келіспейді. Ол өзін ақтауды сұрайды.