Әкімдіктер жыл сайын Төтенше жағдайлар министрлігіне азаматтық қорғаныс мүлкінің дайындығы туралы хабарлап отыруға міндеттелді

Төтенше жағдайлар министрінің 2024 жылғы 19 желтоқсандағы бұйрығымен азаматтық қорғаныс мүлкін сатып алу, құру және пайдалану қағидаларының жаңа редакциясын бекітілді, деп хабарлайды Orda.kz.       

Ережедегі азаматтық қорғаныс мүлкіне мыналар жатады: жеке қорғану құралдары, радиациялық, химиялық барлау және дозиметриялық бақылау құралдары, жеке медициналық қорғаныс құралдары, байланыс және ескерту құралдары және басқа да материалдық-техникалық құралдар.

Азаматтық қорғаныс мүлкі бейбіт және соғыс уақытында халықты қазіргі заманғы қару-жарақтың зақымдауынан және қауіпті заттарды шығаруға қатысты төтенше жағдайлардан қорғауды қамтамасыз ету үшін қажет.

Азаматтық қорғаныс мүлкі Қазақстан Республикасының мемлекеттік сатып алу туралы заңнамасына сәйкес сатып алынады.

Азаматтық қорғаныс мүлкін құру азаматтық қорғаныс жоспарларында, ал қауіп төнген және тиісті аумақта төтенше жағдай туындаған кезде – төтенше жағдайларды жою жоспарларында көрсетілген қазіргі заманғы қаруды қолданудың мүмкін болатын жағдайларын ескере отырып айқындалады.

Облыстардың, республикалық маңызы бар қалалардың, астананың жергілікті атқарушы органдары жыл сайын тиісті жылдың 1 желтоқсанынан 10 желтоқсанына дейін азаматтық қорғау саласындағы уәкілетті органның аумақтық органдарына жинақтау, сақтау, азаматтық қорғаныс мүлкінің әзірлігін қамтамасыз ету, есептен шығару және кәдеге жарату туралы ақпарат береді. 

Азаматтық қорғаныс мүлкі мақсаты бойынша пайдаланылуы тиіс.

Сондықтан  азаматтық қорғаныс мүлкін соғыс уақытында пайдалану азаматтық қорғаныс жоспарымен белгіленеді. Ал азаматтық қорғаныс мүлкін бейбіт уақытта пайдалану төтенше жағдайларды жою жоспарымен белгіленеді.