Әкімдіктер қарыз алу мақсаттарын тізімдеп көрсетеді

Әкімдіктер қарыз алу мақсаттары тізбесін бекітуге дайындалып жатыр, деп хабарлайды Orda.kz.

«Облыстардың, республикалық маңызы бар қалалардың және астананың жергілікті атқарушы органдарының қарыз алу мақсаттарының тізбесі қосымша бекітілсін» деп жазылған Үкімет қаулысы жобасында.

Қаулы алғашқы ресми жарияланған күннен күнтізбелік 10 күн өткен соң қолданысқа енгізіледі және 2025 жылғы 1 қаңтардан бастап туындаған құқықтық қатынастарға қолданылады деп күтілуде.

Облыстың, республикалық маңызы бар қаланың, астананың жергiлiктi атқарушы органдарының қарыз алуы облыстардың, республикалық маңызы бар қалалардың және астананың жергiлiктi атқарушы органдарының мемлекеттiк бағалы қағаздарды iшкi нарықта айналысқа шығаруына қатысты.

Құжат авторлары түсіндіргендей, қаулы жобасында жергілікті атқарушы органдар өз өңірлеріндегі бірқатар басым бағыттарды қаржыландыру үшін мемлекеттік бағалы қағаздарды ішкі нарықта айналысқа шығару мүмкіндігін береді.

Қарыз алу мақсатының бекітілген тізімі үш негізгі бағытты қамтиды:

• 
   тұрғын үй құрылысы – «Тұрғын үй құрылысына үлестік қатысу туралы» Қазақстан Республикасының заңына сәйкес тұрғын үй салуды және сатып алуды, сондай-ақ үлестік құрылысқа қатысуды қаржыландыру;
•  инфрақұрылымды жаңғырту – мемлекеттік жоспарлау стратегиясын іске асыру шеңберінде ағынды суларды тазарту қондырғылары, сондай-ақ жылумен және электрмен жабдықтау объектілері сияқты объектілерді реконструкциялау, салу және жаңғырту;
• 
  мектептерді жөндеу – мектептегі білім сапасын арттыру мақсатында білім беру мекемелерін жаңарту және жаңғырту.