Әкімдік олигархтан тартып алуға тырысып жатқан Шымкент саябағында балалар аттракциондары отқа оранды

Шымкентте таңертең «Кең баба» саябағында өрт шықты, жалын 230 шаршы метр аумақты жойып жіберді, деп хабарлайды Orda.kz.

Шымкентте 23 қаңтар күні таңертең «Кең баба» саябағында өрт шықты. Өрт балалар аттракциондары орналасқан аймақты қамтып, 230 шаршы метр аумақты жойып жіберді

«Әл-Фараби ауданы Тәуке хан даңғылы бойында орналасқан аттракциондар саябағы аумағында төбе астында орналасқан ойын автоматтарында өрт болып, екі қабатты мейрамхана шатыры мен екі кеңсе бөлмесіне тараған», деп хабарлады Шымкент қалалық ТЖД баспасөз қызметі.

Өрт екі сағаттан соң сөндірілді. Тұтану себептері анықталуда. Зардап шеккендер жоқ.

Еске сала кетейік, өткен жылы «Кең баба» саябағы Шымкент қаласы әкімдігі мен танымал кәсіпкер Қайрат Сапарбаевтың арасында дау тудырған болатын. Сапарбаев саябақты 1999 жылы басқаруға алған еді.

25 жылдан кейін жергілікті билік саябақты мемлекет меншігіне қайтаруды талап етіп, сотқа жүгінді. Шенеуніктер жеңіске жетіп, 2024 жылдың сәуірінде Шымкент соты әкімдік талабын қанағаттандырып, саябақтың бір бөлігін мемлекеттік меншікке қайтарды.

Алайда саябақтың қалған бөлігіне қатысты дау әлі де жалғасуда.