Айып тағылған Гүлнара Каримова сотта жеңіп шықты

Швейцария сотында жеңіп шыққан Ислам Каримовтың қызы Гүлнара Каримова бұғатталған 350 миллион долларын қайтарып алуы мүмкін.

«Бұл Гүлнара Каримова үшін маңызды жеңіс. Федералдық прокуратура оның активтерін тәркілеп, осы процесте негізгі құқықтарынан айыруға тырысты», - деді швейцариялық адвокаты Грегур Манжа.

Қыркүйекте Өзбекстанмен келісім жасаған Швецария, 2012 жылдан бері Каримованың Швейцария банкінде қалып қойған 131 миллион долларын қайтаратынын мәлімдеген.

Осыған дейін Каримованың үстінен "ақша жымқыру" және "бопсалау" баптары бойынша үш рет қылмыстық іс қозғалып, үшеуінде де бұрынғы президенттің қызы кінәлі деп танылған. Оған "салықтан жалтарды", "қаржы жымқырды", "бопсалады", "офшор компаниясының құжаттарын жойды" дегеп айып тағылып, 2017 жылы 10 жылға бас бостандығынан айырылған.

Соңғы іс бойынша Каримованың 13 жыл 4 айға бостандығы шектелген болатын.

Мамырда Франция Өзбекстанға Каримованың 10 миллион долларын қайтарған. Бұл қаражат қазіргі таңда Өзбекстанның мемлекеттік бюджетіне аударылды.

Өзбекстан билігі активті қайтару бойынша Швейцария, АҚШ, Франция, Ресей Федерациясы және өзге елдердің құзырлы органдарымен жұмыс істеп жатыр. Ақпарат бойынша, мәселе Каримованың 1,3 миллиард доллар активі жайлы болып отыр.

Қазіргі кезде Гүлнара Каримова Ташкент облысына қарасты Зангиат ауданындағы әйелдер колониясында жазасын өтеуде.