Қайрат Сатыбалдының экс-әйелі Шымкентте 747 млн теңгені жымқырды деген күдікке ілінді

Шымкент қаласының Сыбайлас жемқорлыққа қарсы қызметі ерекше ірі көлемде – 747 млн теңге бюджет қаражатын ұрлау фактісі бойынша сотқа дейінгі тергеу жүргізіп жатыр.

«Шымкент қаласы бойынша Сыбайлас жемқорлыққа қарсы қызмет «Шымкент қаласының жолаушылар көлігі және автомобиль жолдары басқармасы» мемлекеттік мекемесінің лауазымды тұлғаларына және «Ария-Жаңа Астана» ЖШС басшылығына, оның ішінде Сатыбалды Гүлмираға қатысты сотқа дейінгі тергеу амалдарын жүргізуде. 2021 жылы іс жүзінде аяқталмаған құрылыс-монтаждау жұмыстары үшін төленген аса ірі сомада (747 млн теңге) бюджет қаражатын жымқыру фактісі анықталды» делінген Антикордың баспасөз қызметі хабарламасында.

Тергеу мүддесін көздейтін басқа ақпарат жария етілмейді.

Еске салсақ, 18 наурыз Назарбаевтың немере інісі Қайрат Сатыбалдының бұрынғы әйелі Гүлмира қамауға алынды. Қазіргі таңда ол тергеу изоляторында.

Гүлмира Сатыбалдыға екі рейдерлік эпизод бойынша айып тағылған. Екеуінің де Баян Мақсатқызының күйеуіне қатысы бар.