Қайрат Нұртас тағы да той аралап жүр. Бұл жолы Алматыда

Қазақстандық эстрада жұлдыздары Қайрат Нұртас пен Кенжебек Жанәбілов карантинге қарамай жұмыс істеген Алматыдағы мейрамханалардың бірінде ұсталды, деп хабарлады Orda.kz. Almaty телеарнасына сілтеме жасап.

Мейрамханаға бақылау тобының мүшелері барған. Онда екі жүзге жуық адам болған.

– Үш сағат бойы қожайындар есікті жауып алып, инспекторларды кіргізбеді. Нысан электр желісінен ажыратылғаннан кейін ғана жұмыс тобының өкілдері ішке кіре алды. Мұның арты жанжалға ұласып, нәтижесінде Алматы телеарнасы түсірілім тобының жабдықтары зақымдалды, - деп хабарлады телеарна.

Түнде 200 адам аудандық полиция бөліміне жеткізілді. Тәртіп бұзушыларға 87 мың теңге айыппұл салынды. Мекеме иесі де әкімшілік жауапкершілікке тартылып, 670 мың теңге төлеуге міндеттелді.

Еске салсақ, бұған дейін Қайрат Нұртас Семейдегі тойға келді деген хабар тараған. Оны тойдағы қонақтардың бірі айтқан. Әнші түсіп қалған бейнежазба әлеуметтік желілерде тараған, алайда кейінірек оны өшіріп тастаған.