Қайрат Боранбаев пен Қайрат Сатыбалдының қамау мерзімі ұзартылды

12 мамыр күні Нұр-Сұлтан қаласының мамандандырылған ауданаралық тергеу соты күдікті Қайрат Сатыбалдыға қатысты күзетпен ұстау түріндегі санкцияланған бұлтартпау шарасын 1 ай мерзімге ұзартты.

Сыбайлас жемқорлыққа қарсы қызмет «Қазақтелеком» АҚ-ның лауазымдық өкілеттіктерін асыра пайдалану және қаражатын аса ірі мөлшерде ұрлау дерегі бойынша қылмыстық істі тергеп жатыр. Бұл қылмыстарды жасады деген күдікпен Қайрат Сатыбалдыұлы ұсталып, уақытша ұстау изоляторына қамалған еді.

Сондай-ақ, 10 мамырда Нұр-Сұлтан қаласының мамандандырылған ауданаралық тергеу соты күдікті Қайрат Боранбаевқа қатысты қамауда ұстау түріндегі санкцияланған бұлтартпау шарасын 1 ай мерзімге ұзартты.

Қайрат Боранбаев елдегі ең ірі байлардың бірі. Ол «Forbes Kazakhstan» рейтингінде 590 миллион доллар байлығымен 14-ші орында тұр. Бұрынғы президенттің құдасы, елдегі ірі кәсіпкер Қайрат Боранбаевты Алматыда қаржы мониторингі агенттігінің қызметкерлері ұстаған болатын.