Әйгерім Тілеужан колониядан екінші рет емделуге шығарылмады

Журналист Әйгерім Тілеужанова колонияда екінші рет емделуге жібрілмей отыр, деп хабарлайды Orda.kz порталы.

«Қылмыстық іс қозғалғаннан кейін Әйгерім Тілеужан екінші рет жоспарлы ақылы емделуге жіберілмеді. Оған себеп айтылмайды», – дейді адвокаты Айнара Айдарханова.

Еске салсақ, 5 наурыз күні журналистің үстінен жаңа қылмыстық іс қозғалған болатын.

2022 жылдың қазан айында Әйгерім Тілеужан Алматы әуежайындағы қаңтардағы тәртіпсіздікке қатысты күдікті болғаны айтылды. Оған Қазақстан Республикасы Қылмыстық кодексінің 272-бабының 1-бөлігімен (зорлық-зомбылықпен, қырғынмен, өрт қоюмен, мүлікті жоюмен, атыс қаруын, жарылғыш заттарды немесе жарылғыш құрылғыларды қолданумен, сондай-ақ билік өкіліне қарулы қарсылық көрсетумен ұштасқан жаппай тәртіпсіздіктер ұйымдастыру) бойынша айып тағылған болатын.

2023 жылдың сәуір айында Әйгерім Тілеужанова бұл істің өзіндік астары бар екенін мәлімдеген болатын.

Былтыр шілде айында оны 4 жылға бас бостандығынан айыруға үкім шыққан болатын. Ал қаңтардың 30-ы күні белсенді Ринат Рафхат колонияда отырған саясаткер Әйгерім Тілеужанның денсаулығының нашарлағаны туралы хабарлады.

2024 жылдың 5 наурызында Әйгерім Тілеужанға қатысты жаңа қылмыстық іс қозғалды. Оның адвокаты істі қысқарту керектігін мәлімдеді.