АЭС үшін 14 млрд доллар: Сәтқалиев жоба құнын түсіндірді

Атом энергиясы агенттігінің төрағасы Алмасадам Сәтқалиев ел аумағында салынады деп жоспарланған атом электр станциясының (АЭС) болжамды құнын мәлімдеді, деп хабарлайды Orda.kz.

«Жобаның нақты құны техникалық-экономикалық негіздеме (ТЭН) әзір болғаннан кейін белгілі болады. Қазіргі уақытта бізде конкурсқа қатысушы вендорлар ұсынған индикативті параметрлер бар. Алайда бұл көрсеткіштер әзірге жарияланбайды, себебі тараптар арасында жасалған құпиялық келісімдермен қорғалған. Жалпы әлемдік тәжірибеге сүйенсек, осындай ауқымдағы станцияның құны кемінде 14 миллиард доллар болуы мүмкін», – деді Сәтқалиев.

Сонымен қатар, ол құрылыс мерзіміне қатысты нақты мәлімет бере алмайтынын айтты. Оның болжамынша, станцияны салу шамамен жеті жылға созылуы мүмкін.

«Қазір біз Корея мен Франция компанияларымен келіссөздер жүргізіп жатырмыз. Бұл тараптар алдын ала конкурсқа қатысуға қызығушылық білдірді. Бірақ нақты шешім келіссөздердің нәтижесіне байланысты қабылданады», – деді агенттік басшысы.

Сәтқалиевтің айтуынша, түпкілікті шешім үкіметаралық келісімге қол қойылғаннан кейін ғана қабылданбақ. Бұл жұмыс 2025 жылдың соңына дейін аяқталады деп жоспарланып отыр.