АЭС құрылысына қарсылық білдірген белсенділерге 5 жыл жаза сұралды

Прокурор былтыр АЭС салуға қарсылық білдірген белсенділерді бес жылға соттауды сұрады, деп хабарлайды Orda.kz.

21 тамызда Алматының Алмалы аудандық сотында АЭС салуға қарсылық білдірген бес белсендінің ісі бойынша жарыссөз басталды. Мемлекеттік айыптаушы прокурор Жанат Қазақбай, Нұрлан Жаулыбай, Фазылжан Сыздықов, Нұрлан Темірғалиев және Айдар Мүбараковты Қылмыстық кодекстің 24-бабының 3-бөлігі, 272-бабының 1-бөлігі бойынша кінәлі деп танып, әрқайсысына бес жыл бас бостандығынан айыру жазасын тағайындауды сұрады.

Айта кетейік, 2024 жылы АЭС құрылысына қатысты референдум қарсаңында тәртіпсіздік ұйымдастырған 12 белсенді ұсталған еді. Оның жетеуі ешқайда кетпеу туралы қолхатпен босатылған. Ал қалған бес белсендіге «жаппай тәртіпсіздік ұйымдастыру» бабы бойынша айып тағылған. Белсенділер өздеріне тағылған айыпты мойындамады.

Еске салайық, осыдан үш күн бұрын Алматы облысының Жамбыл ауданында салынғалы жатқан АЭС атауын анықтау үшін байқау жарияланды.