АЭС Курчатов маңында салына ма? — Бектенов жауап берді

Үкімет басшысы Олжас Бектенов санеторлардың АЭС-ті Курчатов маңына салу туралы ұсынысына жауап берді, деп хабарлайды Orda.kz. 

Бектенов Сенат депутаттары сауалына берген жауабында Қазақстанда атом электр станциясы бой көтеретін орын өзгермейтінін айтты. Атом саласын дамыту бойынша ведомствоаралық комиссия атом электр станциясы салынатын орын ретінде Алматы облысы Жамбыл ауданындағы Үлкен ауылының маңын айқындаған. 

Дегенмен, бірқатар сенат депутаты Курчатов қаласына «ғылыми қала» деген мәртебе беруді сұрап, кейіннен осы қала маңында АЭС салуды ұсынды. Сенаторлардың түсіндіруінше, қала маңында желілік инфрақұрылым жақсы дамыған, АЭС салу және пайдалану бойынша жұмыстарды техникалық сүйемелдеуге қажетті ғылыми-техникалық база бар.

Бұл ретте Олжас Бектенов Курчатов қаласына «ғылыми қала» деген мәртебе беру бойынша қазіргі таңда Мәжілісте «Ғылыми ауқымды аймақтар туралы» заң жобасына өзгертулер қаралып жатқанын хабарлады.