АЭС-ке қарсы шыққандар 2 айға қамалды

Orda.kz Алматыда АЭС құрылысына қарсы бір топ адам ұсталғанын жазған болатын. Құзырлы органдардың сөзінше олар жаппай тәртіпсіздік ұйымдастырды деп күдікті болып отыр. Алматыда атом электр станциясы құрылысына қарсы 12 белсендінің 6-уына тергеу соты 2 айға қамауға санкция берді, деп хабарлайды Orda.kz.

Алматыда атом электр станциясы құрылысына қарсы 12 белсенді тұтқындалды. Кейін олардың алтауы босатылды. Тұтқындалғандарға қатысты қылмыстық іс қозғалды. Белсенді Ринат Рафхаттың хабарлауынша, ұсталғандардың ең үлкені 60 жаста. Оның айтуынша егде тартқан жандардың денсаулығы нашар, үнемі дәрі ішіп жүреді.

Orda.kz тілшісі олардың адвокаты Төлеген Берліқожаға хабарласып мән-жайды сұрастырды.

«Олар Қылмыстық кодексінің 272-бабы 1-бөлігі бойынша күдікті, яғни «жаппай тәртіпсіздік ұйымдастыру» деген айыппен сотталғалы жатыр. Өздері АЭС-ке қарсымыз деп айтқан. Сараптама мен тергеу құпия болған соң, егжей-тегжейлі айта алмаймыз. Сараптама тергеу ісі біткен соң ғана қолымызға түседі», — деді Төлеген Берліқожа.