АЭС-ке қарсы азаматтар қор құрғанын мәлімдеді

Атомдық электр станциясы құрылысына қарсы құрылған қордың басшысы ретінде Әсет Наурызбаев тағайындалды, деп хабарлады Orda.kz.

10 қыркүйекте АЭС қарсыластары Қазақстанның баспасөз-клубында баспасөз конференциясын өткізіп, Балқаш көлінде атом электр станциясын салуға қатысты өз ұстанымдарын тағы бір рет жариялады. Белсенділер болашақта апат болуы мүмкін деген қауіптерін, бұл тек адамдарға емес, көлге де зиян тигізетінін айтты. Сонымен қатар, ядролық қалдықтарды сақтау мәселесіне де алаңдайтындарын жеткізді. АЭС қарсыластарының жетекшілерінің бірі Әсет Наурызбаев атомдық электр энергиясының қымбаттығына және ядролық энергетика технологияларының ескіргендігіне назар аударып, күн және жел энергиясына басымдық беру қажеттігін айтты.

Баспасөз конференциясында Наурызбаев Қытайдан электр желілеріне резервтік қуат көзі құру идеясы туралы да айтты. Бұл Ресейден алынатын резервтік қуат көзіне қосымша болады. Ол сондай-ақ Қазақстанда жел және күн электр станциялары үшін қымбат жинақтағыштарды салудың қажетсіздігін атап, олардың орнына гидроэлектр станцияларын пайдалануға болатынын айтты.

«Күн мен жел көп болғанда, ГЭС санитарлық көлемге дейін су ағызуды тоқтатады және өзінде энергия жинақтайды. Күн мен жел тоқтап қалған кезде шлюздер ашылады да, су үлкен көлемде электр энергиясын өндіреді. Қазіргі таңда бұл энергияны жинақтаудың бірден-бір тәсілі», — деді Наурызбаев Orda.kz журналистіне берген сұхбатында. 

Сонымен қатар, АЭС қарсыластары «Энергетикалық өту» қоғамдық қорын құрғандарын мәлімдеді.

«Біздің қорымызға қандай да бір ұйымдар кірмейді. Ол Қазақстан Республикасының азаматтары тарапынан құрылған және құрамында тек Қазақстан Республикасының азаматтары бар»,  деп мәлімдеді қор негізін қалаушылардың бірі Вадим Ни.

Қор жетекшісі ретінде Әсет Наурызбаев тағайындалды.

Қазақстанда АЭС-ті екі өңірде, Абай облысындағы Курчатов қаласына жақын жерге және Алматы облысының Балқаш маңындағы Үлкен ауылына жақын жерге салу жоспарланып отыр.

Еске сала кетсек, Orda.kz тілшілері АЭС салу мәселесіне қатысты ашық талқыланған Алматыдағы дауға толы жиынға және Астанадағы жиынға қатысқан болатын.