АЭС бойынша референдумға мемлекет бюджетінен 15,5 миллиард теңге бөлінді

Қазақстанда атом электр станциясын (АЭС) салу мәселесі бойынша референдум өткізуге мемлекеттік бюджеттен 15,5 миллиард теңге бөлінді, деп хабарлайды Orda.kz.

Орталық сайлау комиссиясы (ОСК) АЭС салу мәселесіне арналған бүкілхалықтық референдумды ұйымдастыру мен өткізуге қатысты алғашқы отырысын өткізді.

Референдумға дайындықтың күнтізбелік жоспары бекітілді:

• 12 қыркүйекке дейін – аумақтық және учаскелік комиссиялардың құрамы мен дауыс беру учаскелері туралы ақпарат жарияланады.
• 15 қыркүйек – сайлаушылар тізімін жасау.
• 26 қыркүйек – азаматтарды дауыс беру уақыты мен орны туралы ақпараттандыру.
• 3-5 қазан – бюллетеньдерді учаскелерге жеткізу.
• 5 қазан – дауыс беру алдындағы тыныштық күні.
• 6 қазан 7:00-ден 20:00-ге дейін – дауыс беру күні.

Дауыс беру нәтижелері 7-12 қазан аралығында бұқаралық ақпарат құралдарында жарияланады.

Отырыста бөлінген қаржының едәуір бөлігі сайлау комиссиялары мүшелерінің жалақысын төлеуге бағытталатыны айтылды, жалпы референдумға 70 049 адам атсалысады.

Ел бойынша барлығы 10 327 дауыс беру учаскесі ұйымдастырылады: 9 709 — сайлаушылардың тұрғылықты жері бойынша, 618 — басқа өңірлерде уақытша жүргендер үшін және 63 елдегі 78 учаске.

ОСК мәліметі бойынша, 12 176 968 қазақстандықтар АЭС салу мәселесі бойынша өз дауысын бере алады.