Әйелін ұрғаны үшін 80 сағаттық қоғамдық жұмыстарға жегілді

Мас күйінде жұбайын ұрып-соққан ақтөбелік қоғам игілігі үшін күніне бірнеше сағат тегін еңбек етеді.

Отбасылық-тұрмыстық жанжал маусым айының соңында, ерлі-зайыптылар көршісінің үйіне бірге барғаннан кейін болды. Көршілеріне барған ер адам алкогольдік ішімдіктер ішкен. Үйге мас күйінде оралған төрт баланың әкесі, түн ортасында қызғаныштан әйелін бірнеше рет ұрған.

Осы факті бойынша полиция ҚР ҚК-нің 108-1-бабы бойынша "Денсаулыққа қасақана жеңіл зиян келтіру" бойынша дереу қылмыстық іс қозғады және күдікті қамауға алынды. Сонымен қатар, жәбірленушіге қатысты сот-медициналық сараптама тағайындалды, әйелдің денсаулығына жеңіл зиян келтіру фактісі расталды.

"Сотта 46 жастағы айыпталушы өз кінәсін толық мойындады, ал жәбірленуші болашақта жұбайымен ажырасуға ниет білдіріп, мұндай жағдай оларда бірінші рет емес екенін айтты, бірақ ол бұрын полицияға жүгінбеген. Нәтижесінде әйелінің денсаулығына қасақана жеңіл зиян келтіргені үшін сот үкімімен ер адам кінәлі деп танылып, оған қатысты 80 сағатқа қоғамдық жұмыстарға тарту түрінде қылмыстық жаза тағайындалды. Сотталушы жазадан жалтарған жағдайда, ол қамауға алынуға ауыстырылады. Сонымен қатар, қылмыс мас күйінде жасалғанын ескере отырып, сот сотталушыға үш ай мерзімге алкогольдік ішімдіктерді ішуге тыйым салды" деп хабарлады Ақтөбе облысының полиция департаменті.

Қазіргі уақытта ер адам полицияның профилактикалық есебіне қойылып, ерекше бақылауға алынды.