Әйелін сыныптастар кешінен соң мылтықпен атқан ер адамның ісі сотта қаралып жатыр

Қырғызстанда мектеп бітіргеніне 20 жыл толуына орай өткен сыныптастармен кездесуге барған әйелін мылтықпен атып өлтірген ер адамға қатысты сот басталды, деп хабарлайды Orda.kz.

Радио Азаттықтың мәліметінше Ош облысының Өзген ауданындағы сотта жергілікті тұрғын Айзирек Ералиеваны өлтіру ісі бойынша сот басталды. Күдікті марқұмның жұбайы, оған кісі өлтіру және қару-оқ құралдарын заңсыз сақтап қолданған деген айыптар тағылды.

Ақпарат көздерінде әрі тергеу және айыптау мәліметіне сәйкес, марқұм келіншек  сыныптастарымен жиырма жылдық кездесуге барғаннан кейін күйеуі қызғаныштан атып тастаған. Ер адам сол сәтте-ақ ұсталып, уақытша ұстау изоляторына қамалған.

Айзирек Ералиеваның отбасы оны өмір бойы бас бостандығынан айыруды талап етеді.