Айдос Үкібай Путинмен жолыққан Назарбаевқа қатысты түсініктеме берді

Нұрсұлтан Назарбаевтың Мәскеуге сапары жайлы Айдос Үкібай түсініктеме берді, деп хабарлайды Orda.kz.

Экс-президент Нұрсұлтан Назарбаевтың Ресейге сапары жайлы баспасөз хатшысы Айдос Үкібай түсініктеме берді.

«Нұрсұлтан Назарбаевтың Мәскеуге сапарының жеке, бейресми сипатта болғанын хабарлаймыз. Қазақстанның тұңғыш президентін Ресей президенті Владимир Путинмен көпжылдық достық қатынастар байланыстырады. Бұл байланыстар мемлекеттік өкілеттіктердің бар-жоғына қарамастан сақталып отыр» деп жазды Айдос Үкібай.

Сондай-ақ, Үкібай экс-президент әлемдік көшбасшылармен үнемі байланыста екенін атап өтті. 

«Телефон арқылы сөйлесіп, жеке хат-хабар алмасып, кездесу өткізеді. Бұл тек Ресейге ғана емес, Түркия, Қытай, БАӘ, Өзбекстан, Беларусь және басқа да мемлекеттерге қатысты. Мемлекеттік қызметте жоқ беделді саяси қайраткерлермен жеке кездесулер – қалыпты дипломатиялық тәжірибе. Мысалы, Нұрсұлтан Назарбаевпен кездескен күні Ресей президенті Жапонияның марқұм премьер-министрі Синдзо Абэнің жесір әйелі Акиэ Абэмен де кездесті» деп жазды Айдос Үкібай. 

Сондай-ақ, Нұрсұлтан Назарбаев Жеңістің 80 жылдығына арналған шараларға шақырылған. Алайда, Үкібайдың айтуынша, объективті себептерге байланысты ресми мерекеге қатыса алмады. Сондықтан Мәскеуге кейінірек жеке сапармен барды.

Айдос Үкібайдың сөзінше, Нұрсұлтан Назарбаев  Қазақстанда тұрақты тұрады.

«Елден кетті деген мәліметтер шындыққа жанаспайдын» деп жазды Айдос Үкібай.