Аятолла Хаменеи соғыстан кейін алғаш рет көпшілік алдына шықты

Иранның Жоғарғы рухани көшбасшысы аятолла Али Хаменеи Израильмен соғыс басталғалы бері алғаш рет жұрт алдына шықты, деп жазады Orda.kz.

IRNA агенттігінің ақпараты бойынша, аятолла Тегерандағы имам Хомейни есімімен аталатын хусейнияда имам Хусейннің шәһид болғанын еске алуға арналған діни рәсімге қатысты.

«Аятолла Хаменеи имам Хусейннің шәһид болғанын еске алуға арналған аза рәсіміне жиналған жұрт алдына шықты», – делінген ресми хабарламада.

Израильмен қақтығыс басталғаннан бері Хаменеи 25 күн бойы жұрт алдына шықпаған. Осы уақыт ішінде ол тек екі бейнеүндеу арқылы халыққа жолықты. Бұл – діни шараларды ешқашан қалт жібермейтін Жоғарғы көшбасшы үшін тосын жағдай.

Ел ішінде оның денсаулығына қатысты түрлі қауесет тарады. Кейбір ақпарат құралдары билік оның орнына лайық мұрагер іздей бастады деп жазған. Алайда Bild басылымы сілтеме жасаған сарапшылар аятолланың қауіпсіздік мақсатында бункерде жасырын отырғанын жоққа шығармайды.

Маусым айының басында Хаменеи АҚШ-ты Иран ісіне араласпауға шақырып, Тегеранның «жауапты шабуыл» жоспары дайын екенін айтты.