Ай сайын 5 000 доллар - Антикор Әлтаевқа қатысты тергеу жайын айтты

Антикор тергеу барысында бұрынғы еңбек және халықты әлеуметтік қорғау вице-министрі, сондай-ақ Мәжілістің бұрынғы депутаты Нұржан Әлтаевтың ұсталуының кейбір себептерін жариялады.

«Н.Б.Әлтаев 2018-2019 жылдар аралығында Қазақстан Республикасы Еңбек және халықты әлеуметтік қорғау вице-министрі қызметін атқара отырып, «Атамекен» ҰКП Басқарма төрағасы А.И.Мырзахметовтен пара ретінде ай сайын 5000 АҚШ доллары көлеміндегі қолма-қол ақша алып отырған. Кейіннен Қазақстан Республикасы Парламенті Мәжілісінің депутаты ретінде жаңа лауазымды атқара отырып, Әлтаев 2019-2020 жылдар аралығында Мырзахметовтен пара алу мақсатындағы осы  сыбайлас жемқорлық әрекеттерін жалғастырған» делінген хабарламада.

Әлтаев барлығы 135 мың доллар пара алған, бұл әсіре үлкен сомаға жатады, деп хабарлайды Антикор.

«Пара «Еңбек» Нәтижелі жұмыспен қамтуды және жаппай кәсіпкерлікті дамытудың мемлекеттік бағдарламасы бойынша мемлекеттік тапсырысты алуға жәрдемдесу, сондай-ақ Әлтаев жетекшілік ететін салаларда Мырзахметовтің мүддесін қорғау және жүргізу үшін берілген» делінген сыбайлас жемқорлыққа қарсы іс-қимыл департаменті жариялаған жазбада.