Air Astana-ны 20 жыл басқарған Питер Фостер компаниядан кетеді

«Эйр Астана» АҚ директорлар кеңесі Питер Фостер 2026 жылдың наурызының соңында бас атқарушы директор және директорлар кеңесінің мүшесі қызметтерінен кететінін мәлімдеді, деп хабарлайды Orda.kz.

Оның орнына қаржы жөніндегі атқарушы директор Ибрахим Жанлыел осы кезеңде бас атқарушы директор қызметіне тағайындалады.

Алайда Фостер компаниялар тобымен байланысын сақтап, директорлар кеңесіне аға кеңесшісі ретінде өз қызметін жалғастырады. 

«Директорлар кеңесі Питер Фостерге компанияны 20 жыл бойы басқарған ерен еңбегі үшін шын жүректен алғыс білдіреді. Ол Компанияны құрылған кезеңінен бастап бүгінгі таңда Қазақстан мен Орталық Азияның жетекші әуе компаниясына және әлемдік авиация саласында мойындалған брендке дейін жеткізді», — деп жазылған хабарламада.

Еске сала кетейік, мәжілістің Үкімет сағатында депутаттар Air Astana компаниясының президенті Питер Фостерге сұрақ қойып, оның компаниясына қатысты сын айтты.