Air Astana блогер Асхат Ниязовтың жазбасына түсініктеме берді

Air Astana блогер Асхат Ниязовтың Instagram және Telegram әлеуметтік желілеріндегі жазбасына түсініктеме берді, деп хабарлайды Orda.kz порталы.

Компания бұл туралы өзінің Telegram әлеуметтік желісінде жауап берді.

«Әуекомпания шынымен Атыраудан ұшатын отандастар үшін билет құны 40 000 теңге болатын арнайы тариф енгізді. Дегенмен, бұл бағыт бойынша сұраныстың өскенін ескеруіңізді сұраймыз. Өкінішке қарай, рейстерде орындар саны шектеулі және Атыраудан жақын арада орындалатын рейстерде эконом-кластағы билеттер сатылып кетті де, сатылымда бизнес-класс билеттері ғана қалды. Скриншотта Атырау-Астана билетінің бизнес-кластағы құны көрсетілген, өйткені эконом-класта 23 және 24 сәуірге билет қалмаған. Сайтымызда осы бағыттағы билеттерді эконом-класта 25 сәуірден бастап таба аласыздар. Бұған дейін Air Astana тобы Атыраудан Алматы, Астана, Ақтау, Шымкент қалаларына 9 сәуір мен 18 сәуір аралығында қосымша 33 рейс ұйымдастырған. Тұрақты рейстермен қатар барлығы 95 рейс орындалады» делінген жазбада.

Журналист өзіне айтылған жауапты өз Телеграм арнасына ала отырып, тағы да кері пікір жазды.

«Достар, қазіргі уақытта бизнес-класс дегенді кім алады? Дәл қазір су басқан қалалардан «бизнес-класс» ұғымын алып тастаңыз және қарапайым жолаушыларды тиісті бағаға отырғызсаңыз жақсы болар еді. Бұл деген Төтенше жағдай емес пе?!» деп жазды журналист.