«Air Astana» әуе компаниясына миллиард теңгеге жуық айыппұл салынды

«Air Astana» әуе компаниясына жанармайдың үстеме ақысын негізсіз пайдаланғаны үшін миллиард теңгеге жуық айыппұл салынды.

Компанияға Бәсекелестікті қорғау және дамыту агенттігі мен прокуратура тексеру жүргізген.

«Эйр Астана жөнелтілетін күні немесе жақын күндері әуе билеттерін сатып алу кезінде жолаушылардың барлық санаттарынан 3500-ден 6500 теңгеге дейін негізсіз жанар-жағармайға үстеме ақы алғаны, оны қолдану мақсаты мен принципін іс жүзінде залалсыздандырғаны анықталды» деп хабарлады ведомства.

Нәтижесінде әуе тасымалдаушы 876 миллион теңгеден астам сомаға әкімшілік жауапкершілікке тартылды.

Компания 2024 жылдың соңына дейін ішкі рейстер бағасын көтермеуге міндеттелді.