Аида Балаева «Бірақ» ток-шоуы жабылатынын мәлімдеді

ҚР Мәдениет және ақпарат министрі Аида Балаева «Хабар» арнасындағы «Бірақ» ток-шоуы» туралы мәлімдеме жасады, деп хабарлайды Orda.kz порталы.

«Тұрмыстық зорлық-зомбылық» тақырыбын қозғаған, жаңадан ашылған  «Бірақ» бағдарламасы қоғамда резонанс тудырған болатын. Аталмыш бағдарлама туралы министр Аида Балаева өз ойын айтты.

«Отбасылық құндылықтарды насихаттау, ана мен баланы қорғау жөніндегі қызметті үйлестіру, отбасылық-тұрмыстық зорлық-зомбылыққа қарсы іс-қимылды насихаттау министрліктің басты міндеттерінің бірі. Өз кезегінде, 11 наурыздан бастап «Хабар» арнасында отбасындағы әлеуметтік мәселелерін көтеріп, оны шешуге бағытталған «Бірақ...» бағдарламасы шықты. Алайда, тікелей эфирде берілген шығарылымда редакция бағдарламаның діттеген мақсатына жете алмай, кейіпкерді жаңылыстыру арқылы қоғамда түрлі пікірлер туындатты»,- деді ол.

Министр ток-шоуды жабуды тілге тиек етті.

«Мемлекеттік идеологияны жүргізіп отырған мемлекеттік телеарна бұндай олқылыққа жол бермеуі тиіс еді. Ең алдымен, редакция барлық этикалық нормаларды сақтап, отбасылық-тұрмыстық зорлық-зомбылық пен арандатушылыққа жол бермеуі, кейіпкерлерді көпшілік алдында қорламауы қажет еді. Сондықтан телеарна редакциясына бұл үлкен сабақ болады деп санаймыз. Аталған ток-шоу жабылады» деп жазды министр өзінің Facebook парақшасында.