Ахмет Байтұрсынұлы мен Міржақып Дулатұлына ескерткіш ашылды

Сенат төрағасы Мәулен Әшімбаев Мемлекет басшысының тапсырмасымен Ахмет Байтұрсынұлының туғанына 150 жыл толуына арналған іс-шараларға қатысу үшін Қостанай облысына келді.

«Ұлтына ғұмырын арнаған Ұлы тұлға» атты ғылыми-тәжірибелік конференцияда Сенат спикері ел Президенті Қасым-Жомарт Тоқаевтың атынан құттықтау хатын оқып берді.

Мәулен Әшімбаев Қазақстанда Ахмет Байтұрсынұлының мұрасын насихаттау бойынша жүргізіліп жатқан жұмыстарға да тоқталды.

— Мерейтой аясында ауқымды жұмыстар атқарылуда. Ахмет Байтұрсынұлының есімі елді мекендер, көшелер, нысандар атауларында мәңгілік қалады. Оның туған жерінде шағын кесене бой көтерді. Мұражай-үйі салынды. Ахмет Байтұрсынұлының мұрасын насихаттау алдағы уақытта да жалғасады, - деп сендірді Мәулен Әшімбаев.

Торғай өңіріндегі  Алаш қозғалысының қайраткерлері Ахмет Байтұрсынұлы мен Міржақып Дулатұлына арналған ескерткіштің ашылу салтанатында сөз сөйлеген Сенат Төрағасы осынау киелі өлкеден бір емес, бірнеше біртуар адамдар шыққанын, олардың арасында Абылай ханның серігі Шақшақ Жәнібек, Амангелді мен Кейкі бар екенін атап өтті. Сонымен қатар халықты ағартушылыққа, бірлікке, ұлтжандылыққа шақырған Ыбырай Алтынсарин да осы өлкеден.

Конференция барысында аймақ басшысы Архимед Мұхамбетов облыстың оңтүстік өңірлерінің инвестициялық әлеуетін атап өтті.

— Бүгінде бізде 4,4 мың жұмыс орнын құруға мүмкіндік беретін бірқатар инвестициялық жобалар бар. Облыстың оңтүстік өңірлерінде Арқалық қаласы, Амангелді және Жангелді аудандарындағы сияқты жалпы сомасы шамамен 465 млрд теңгені құрайтын 35-тен астам жобаны жүзеге асыру жоспарлануда.

Сонымен қатар, облыстың оңтүстік өңірі бай рухани, мәдени және тарихи мұрасының арқасында жоғары туристік әлеуетке ие екенін де Архимед Мұхамбетов өз сөзінде атап өтті.

Сонымен қатар, сапар барысында Сенат Төрағасы өңірде орын алған өрттердің зардаптарын жоюға атсалысқан еріктілермен әңгімелесті.