Ахмет Байтұрсынов зиялыларды қалай қорғаған?

Құрметті оқырман! Саяси қуғын-сүргін құрбандарын еске алу күні жақындап келеді. Зиялыларымызды бір күн ғана еске алмай, олардың есімін жаңғыртып, істеген ісі ұрпаққа үлгі болсын деген мақсатта Алты алаштың амандығы үшін қанын төккен құрбандар жайлы ақпарат беріп отыруды жөн көрдік.

Ахмет Байтұрсынов: «Мағжан - ақын. Менің ақындарда жұмысым жоқ. Рысқұлов - большевик. Сондықтан да ол мені жақтырмайды. Ал Қожанов - коммунист, ол мені кеңес өкіметінің жауы деп есептейді. Мен де оларды жақтырмаймын».

Бұған қарап бұл үш тұлғаны өзара жау етіп көрсеткен және соны «дәлелдеуге тырысқан үшқары жарияланымдардың жарық көруі өкінішті. Ұлтымыздың ұйытқылары үшін мұндай жөнсіз жорамалдардың кесірінен басқа пайдасы жоқ, күмәнсізге - күдік тудырады, айыптыға - араша ғана әкеледі. Шындығына келсек, патша өкіметі мен кеңестік тергеушілердің арандату тәсілін әбден меңгерген Ахмет Байтұрсынов осы жауабы арқылы Т. Рысқұловты да, С. Сәдуақасовты да, С. Қожановты да қылмыстық іске тартылудан аулақтатып, қорғап қалуды ойлаған және солай болды да...»

Тұрсын Жұртбай, «Ұраным - Алаш», 2008 жыл.

Ықшамдаған Сабина Зәкіржанқызы