Ахмет Байтұрсынұлы туралы фильмнің түсірілімі басталды

Алматыда қазақтың көрнекті қоғам қайраткері және саясаткер Ахмет Байтұрсынұлы туралы фильмнің түсірілімі басталды.

Фильм қазақтың көрнекті ағартушысы, қоғам қайраткері және саяси публицист Ахмет Байтұрсынұлының 150 жылдығына арналған.

Ұлттық киноны қолдау мемлекеттік орталығының баспасөз қызметі хабарлағандай, түсірілім тобын Ерлан Нұрмұхамбетов пен Ерген Тоқмурзин басқарады. Нұрмұхамбетов «Жаңғақ ағашы» фильмі үшін Пусан халықаралық кинофестивалі (Оңтүстік Корея) «Жаңа ағымдар» секциясының гран-при иегері. Режиссердің «Уақыт жолдары» атты соңғы картинасы осы жылы Францияда прокатқа шықты. Оның серіктесі Ерген Тоқмурзин көптеген деректі фильмдердің қоюшы режиссері болған.

Картинаның сюжеті Ахмет Байтұрсынұлының өмірінің барлық кезеңдерін қамтиды.

Басты рөлде – Қазақстанның еңбек сіңірген қайраткері Азамат Сатыбалды.  Біз бұрынғы тергеу изоляторының ғимаратында жайғасқан түсірілім алаңында белгілі актермен сұхбаттастық.

– Бұл ұлт ұстазы Ахмет Байтұрсынұлы туралы фильм. Оның өмірі, қоғамдағы істері және ең бастысы, оның күресі туралы. Бұл мемлекеттің арнайы тапсырысымен түсіріліп жатқан үлкен жоба. Байтұрсынұлы – біздің мақтанышымыз.

Менің ойымша, біздің жас ұрпақ осындай фильмдерді көруі тиіс. Өйткені, Ахмет ағаның жасаған істері, Алаш Орда қайраткерлерінің  ерлігі – бүгін кездеспейтін батылдық. Сондықтан сол кездегі оқиғаларды заманауи көрерменге көрсету керек, – дейді актер.

Сондай-ақ, картинада Назгүл Қарабалина, Александр Багрянцев және Ерлан Кәрібаев бой көрсетеді.

Түсірілім негізінен – Алматы қаласы мен Шығыс Қазақстан облысында жүрді. Қоюшы оператор – Марс Омаров. Бас продюсер – Дастан Атығаев. Сценарий авторы – Ғалым Доскен.  

Жаңа жылға дейін авторлар 14 ауысымды түсіруді жоспарлап отыр. Фильмнің негізгі бөлігі келесі жылы түсіріледі.